അര്‍ഥാര്‍ഥി
നേരായിനിന്നു ചിരിതൂകുന്ന നിന്റെ ലയ-
ഭാവങ്ങളില്‍ മന്ദ്രമായ്
നേരിന്റെ നേരുതിരയുന്നോരെനിക്കു മധു-
രോദാര സൗരഭ്യമായ്
ആരാണു വന്നു ചിരിതൂകുന്നതെന്നതറി-
യാനെന്റെ കാവ്യങ്ങളില്‍
നീ രാവുമായ്ചു പുതു സൂര്യോദയം വിടരു-
വാനായ് ചിരിക്കുന്നുവോ?
നേരിന്റെ നേരിലനുരാഗാഗ്നിതന്‍ കനലു
നീ,യെന്നിലാഴ്ന്നുണരവേ
വീരാര്‍ഥമായതു മഹന്താര്‍ഥമായതു-
മനന്താര്‍ഥജന്മങ്ങളായ്!
നേരായി നേരിലുണരുന്നോരു മൗനമധു-
രാലസ്യലാസ്യലയമായ്
പേരായതും വിജനഭൂവില്‍ വിഷാദലയ
രാഗാഗ്നിയായതുമൊരാള്‍ !
വേരായതും വിരഹനീരായതും വിഫല
ഭാവാര്‍ദ്രയായതുമൊരാള്‍ !
പോരായതും രുധിരവാഴ്‌വായതും കരളി-
ലെല്ലാമൊടുക്കി വിടരാന്‍ !!
ആരാണു പുഞ്ചിരിയിലുന്മാദഭാവമിനി
വന്നീടുമെന്നരുളുവോര്‍ ?
ആരാണു നിന്റെ ഹരിതാഭയ്ക്കു സൗഹൃദസു-
ഗന്ധാര്‍ദ്ര സൗമ്യസ്മിതം?
പോരാ കിനാവുകളിലാരാമരാഗമധു
പൂരം പുരന്ദരഹരേ!
ആരേ പുരന്ദര? നറിഞ്ഞീല കാണ്മു
പദകോശത്തിലര്‍ഥമതുലം!!
ഏതാകിലും ഹൃദയഭാവത്തിനൊത്തുകവി-
താര്‍ഥങ്ങള്‍ മാറുന്നതോര്‍ -
ത്തേറ്റം സ്വഹൃത്തിനൊടിണങ്ങുന്നൊരര്‍ഥമതി-
ലാം സ്വാര്‍ഥമെന്നറിക നീ!!!
'സ്വാര്‍ഥം' 'പരാര്‍ഥമതി' ലാണെങ്കിലര്‍ഥമിവി-
ടെന്തേദ്വയാര്‍ഥകമതായ്?
വ്യര്‍ഥാര്‍ഥവാദമതിലര്‍ഥാര്‍ഥി തന്‍ഗതിയ-
തെല്ലാവിധത്തിലുമിതാ!!
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ